१२ वी परीक्षेच्या पहिल्याच दिवशी वडिलांचे निधन, घरात मृतदेह असतानाही परीक्षा दिली,वाशिमच्या साक्षीला ९० टक्के गुण.
वाशिममध्ये इयत्ता बारावीत असणाऱ्या साक्षी बोरकर या मुलीच्या परिक्षेच्या पहिल्याच दिवशी तिच्या वडिलांचे निधन झाले. अशावेळी घरात वडिलांचा मृत्यूदेह असतानाही साक्षीने परीक्षा केंद्र गाठून १२ वीची परीक्षा दिली.
बुधवारी (८ जून) १२ वीचा निकाल जाहीर झाला आणि यामध्ये साक्षीने ९० टक्के गुण मिळवून यश संपादन केले आहे.
रिसोड तालुक्यातील वडजी येथील शेतकरी रामेश्वर शेषराव बोरकर यांचे ४ मार्च रोजी निधन झाले होते. त्याच दिवशी मुलगी साक्षीचा इंग्रजी विषयाचा पेपर होता.
घरात वडिलांचा मृतदेह असतानाही साक्षीने स्वतःला दुःखातून सावरलं आणि परीक्षा देण्याचा निर्णय घेतला. साक्षीची इंग्रजी विषयाची परीक्षा संपल्यानंतर तिच्या वडिलांवर अंत्यसंस्कार करण्याचा निर्णय नातेवाईकांनी घेतला. साक्षीने सकाळी ११ ते २ या वेळेत परीक्षा दिली आणि मग २ नंतर आपल्या वडिलांवर अंत्यसंस्कार केलं.
