फलटण प्रतिनिधी
श्रीमंत सुभेदार मल्हारराव होळकर यांचे जन्मगाव मुरुम, ता.फलटण व परिसर पर्यटनस्थळ म्हणून विकसीत करण्यासाठी राज्य शासनाची मान्यता मिळाली आहे. पहिल्या टप्प्यात शासनाने १ कोटी ६१ लाख ३१ हजार रुपये निधीची तरतूद व आराखडे अंदाजपत्रकास मंजुरी दिली आहे. विधानपरिषदेचे सभापती मा.ना.श्रीमंत रामराजे नाईक निंबाळकर (महाराज साहेब) यांच्या प्रयत्नाला यश आले आहे. महाराष्ट्र विधान परिषद सभापती ना. श्रीमंत रामराजे नाईक निंबाळकर यांनी त्यासाठी ठोस भूमिका घेवून मुरुम व परिसर विकासाला प्राधान्य दिले आहे. आगामी काळात येथे श्रीमंत सुभेदार मल्हारराव होळकर यांचे भव्य स्मारक उभारुन या शूर वीर लढवय्या पुरुषाची माहिती, त्यांचे पराक्रम, त्यांनी लढलेल्या विविध लढाया व त्यामधील विजयश्री या स्मारकाच्या माध्यमातून तरुण पिढीसमोर ठेवण्याचा त्यांचा प्रयत्न आहे. मुरुम व परिसर पर्यटनस्थळ म्हणून विकसीत करताना मुरुम येथे भक्त निवास, सभामंडप, नीरा नदी घाट वगैरे कामांचे नियोजन करून आराखडा अंदाज पत्रकानुसार १ कोटी ६१ लाख ३१ हजार रुपये मंजूर करण्यात आले. त्यापैकी ७० लाख रुपये गत वर्षी उपलब्ध करुन देण्यात आले आहेत. उर्वरित ९१ लाख ३१ हजार रुपये आता उपलब्ध करुन देण्यात आले आहेत. त्यामुळे आराखड्यातील उर्वरित कामे गतीने पूर्ण करुन घेण्याच्या सूचना ना.श्रीमंत रामराजे नाईक निंबाळकर (महाराजसाहेब ) यांनी संबंधीत यंत्रणांना दिल्या आहेत. अंदाज पत्रक आराखड्यानुसार मुरुम येथे भक्त निवास, सभामंडप, शौचालय, रस्त्याकडेला बंदिस्त गटार, नीरा नदी घाट, मुरुम मधील अंतर्गत रस्ते खडीकरण व डांबरीकरण, गावात पथ दिवे ( स्ट्रीट लाईट ) बसविणे या कामासाठी १ कोटी ६१ लाख ३१ हजार रुपये निधी मंजूर झाला आहे.
