विधान परिषद सभापती श्रीमंत रामराजे नाईक निंबाळकर, तुम्हाला लोकसभेत पहायचयं अजित पवारांच्या रामराजेंना शुभेच्छा : सभापतीपदाची मुदतवाढ मिळणार ?
फलटण प्रतिनिधी :- विकास बेलदार
राज्याच्या विधानपरिषदेचे सभापती व सातारा जिल्ह्याचे राष्ट्रवादीचे नेते ना. श्रीमंत रामराजे नाईक निंबाळकर यांची विधान परिषदेच्या सदस्यत्वाची मुदत जुलैमध्ये संपणार आहे. यानिमित्त विधान परिषदेच्या सभागृहात निरोप समारंभावेळी उपमुख्यमंत्री ना. अजितदादा पवार यांनी ' श्रीमंत रामराजे , तुम्हाला एकदा लोकसभेमध्ये गेलेलं पहायचयं ' अशा शब्दात अनोख्या शुभेच्छा दिल्या. विधान परिषदेच्या सभागृहानेही सभापतीपदावर पुन्हा श्रीमंत रामराजेच हवेत अशी भूमिका मांडल्याने २०२४ पर्यंत श्रीमंत रामराजेंनाच विधान परिषदेवर घेवून पुन्हा सभापतीपदाची संधी मिळण्याची शक्यता आहे.
१५ वर्षांपूर्वी सातारा मतदारसंघ जिल्ह्याचे पुनर्रचनेमुळे राष्ट्रवादीचे नेते श्रीमंत रामराजे नाईक निंबाळकर यांचा हक्काचा फलटण विधानसभा मतदारसंघ आरक्षित झाला. राष्ट्रवादी काँग्रेसचे अध्यक्ष खा. शरद पवारसाहेब व राष्ट्रवादीचे नेते ना. अजितदादा पवार यांनी त्यांना विधानपरिषदेवरसंधी दिली. एवढेच काय राज्याचे सर्वोच्च सभागृह असलेल्या विधानपरिषदेत सभापती पदावर श्रीमंत रामराजेंना विराजमान केले गेले. गेले ६ वर्षे श्रीमंत रामराजे नाईक निंबाळकर हे विधान परिषद सभापतीपदावर उत्कृष्ट काम करत आहेत.
विधान परिषदेला श्रीमंत रामराजेंच्या सभापतीपदामुळे विधान परिषदेच्या सभापतीपदाच्या खुर्चीचीही उंची वाढली आहे. श्रीमंत रामराजेंसह १० जणांच्या विधानपरिषद सदस्यत्वाची मुदत जुलैमध्ये संपणार आहे. यानिमित्त विधान परिषदेत बुधवारी श्रीमंत रामराजे नाईक निंबाळकर यांच्यासह १० सदस्यांच्या निरोप समारंभाचा औपचारिक कार्यक्रम घेण्यात आला. तेव्हा सभागृहातील सदस्यांनी श्रीमंत रामराजेंच्या विधीमंडळ कौशल्याचे व सभागृहाचे कामकाज चालवण्याच्या पध्दतीचे कौतुक केले. सद्य राजकीय परिस्थितीत रामराजेच पुन्हा सभापतीपदावर पाहिजेत असा सदस्यांचा सूर राहिला.
उपमुख्यमंत्री ना. अजितदादा पवार यांनीही ना. श्रीमंत रामराजे नाईक निंबाळकर यांच्यावर स्तुतीसुमने उधळली. राष्ट्रवादी काँग्रेसचे अध्यक्ष खा. शरद पवारसाहेब हे त्यांना पुन्हा संधी देतील. मात्र, रामराजे तुम्हाला एकदा लोकसभेमध्ये गेलेलं पहायचयं असे अजितदादा आवर्जून म्हणाले. सभागृहात उत्तर देताना ना. श्रीमंत रामराजे नाईक निंबाळकर म्हणाले , राष्ट्रवादी काँग्रेसचे निरोपाला अध्यक्ष खा. शरद पवार आपणाला पुन्हा संधी देतील याची मला खात्री आहे. अजितदादांनी शुभेच्छांमध्ये जे सांगितल तेही खूप महत्वाचे आहे.
सद्य स्थितीत सभागृहाला मी सांगू इच्छितो फलटणचा राजवाडा तुम्हा सगळ्यांसाठी कायमचा खुला आहे. अजितदादांच्या सूचक विधानामुळे २०२४ पर्यंत रामराजे नाईक निंबाळकर यांना पुन्हा विधानपरिषदेवर संधी देवून सभापतीपदावर कायम ठेवण्यात येईल व त्यांना लोकसभा लढवण्यास सांगितले जाईल, असेच चित्र दिसत आहे.
